|
|
Հրադադարի ռեժիմը խախտելու՝ Ադրբեջանի փորձերը լարված
իրավիճակ են ստեղծում տարածաշրջանում. ՆԱՏՕ-ում Հայաստանի առաքելության
ղեկավար
|
28/ 06/ 2008
|
ԵՐԵՎԱՆ, 28 հունիսի. /Նովոստի-Արմենիա/. Հրադադարի
ռեժիմը խախտելու՝ ադրբեջանական կողմի փորձերը լարված իրավիճակ են ստեղծում
տարածաշրջանում, ասաց ՆԱՏՕ-ում Հայաստանի առաքելության ղեկավար, դեսպան
Սամվել Մկրտչյանը։ ՀՀ պաշտպանության նախարարության տվյալներով, այս
տարեսկզբից սահմանի վրա գրանցվել են Ադրբեջանի կողմից հրադադարի ռեժիմի
խախտման բազմաթիվ դեպքեր։ «Այս խնդիրը ՆԱՏՕ-ի ուշադրությունից
դուրս չի մնում, և ղարաբաղյան հակամարտության գործընթացում անմիջականորեն
ներառված չլինելով՝ դաշինքը միշտ ուշադրությամբ հետևում է
իրադարձությունների զարգացմանը, մասնավորապես, բանակցային գործընթացի
առաջընթացին», - շաբաթ օրը ասաց Մկրտչյանը լրագրողներին։ Մկրտչյանի
խոսքերով, հակամարտության կարգավորման հարցով զբաղվող առավել արդյունավետ
կառույցն այսօրվա դրությամբ ԵԱՀԿ-ն է, իսկ ԵԱՀԿ-ի գործող նախագահի
անձնական ներկայացուցիչ Անջեյ Կասպրշիկի բազմամյա գործունեությունը ՆԱՏՕ-ն
առանձնահատուկ արդյունավետ է գնահատում։ Միաժամանակ առաքելության
ղեկավարը նշեց, որ «Հյուսիսատլանտյան դաշինքը պատրաստ է աջակցություն
ցուցաբերել յուրաքանչյուր խաղաղ պայմանագրի իրագործման ուղղությամբ, դրա
ստորագրման և ուժի մեջ մտնելու, նրան հարցում ներկայացնելու և
համապատասխան պայմաններ ապահովելու դեպքում»։
|