Ջերմուկում մեկնարկել է շախմատի միջազգային պատանեկան մրցաշարը
	28/ 06/ 2008

ԵՐԵՎԱՆ, 28 հունիսի. /Նովոստի-Արմենիա/. Շախմատի միջազգային պատանեկան  մրցաշարը մեկնարկել է նախօրեին՝ Ջերմուկ քաղաքում։

Ինչպես լրագրողներին հայտարարել է Chess շախմատի ակադեմիայի նախագահ, գրոսմայստեր Սմբատ Լպուտյանը, «Ջերմուկ-2008» բաց մրցաշարն անցկացվում է երրորդ անգամ և արդեն դարձել է ավանդական։ «Ջերմուկն իսկապես շախմատի քաղաք է դառնում», - ավելացրել է Լպուտյանը։

Առաջին փուլի մեկնարկից առաջ «Ջերմուկ-2008»-ի մասնակիցները հարգել են վերջերս 28 տարեկան հասակում մահացած Հայաստանի շախմատի եռակի չեմպիոն, օլիմպիական չեմպիոն Կարեն Ասրյանի հիշատակը։ Նրա անունով է կոչվել Ջերմուկի Շախմատի մարզադպրոցը։

«Ջերմուկ-2008» մրցաշարին մասնակցում են 8-ից 20 տարեկան մոտ 100 պատանիներ և աղջիկներ՝ Հայաստանից, Ռուսաստանից և Իրանից։ Մրցաշարն անցկացվում է ինը փուլով՝ շվեյցարական համակարգով՝ տարիքային հինգ կատեգորիայում (մինչև 10 տարեկան, մինչև 12 տարեկան, մինչև 14, մինչև 16, մինչև 20 տարեկան)  և կավարտվի հուլիսի 6-ին։

Մրցանակային ֆոնդը կազմում է 3,27 մլն դրամ (մոտ 10,8 հազ. ԱՄՆ դոլար)։ Մրցաշարի կազմակերպիչներն են Chess շախմատի ակադեմիան, Ջերմուկի քաղաքապետարանը և «Ջերմուկ աշխարհ» հանգստյան տունը։