Ադրբեջանի ռազմատենչ հայտարարությունները բարդացնում են Ղարաբաղի շուրջ բանակցությունների առաջընթացը. ՀՀ ԱԳ նախարար
	28/ 06/ 2008

ԵՐԵՎԱՆ, 28 հունիսի. /Նովոստի-Արմենիա/. Ադրբեջանի իշխանության կողմից հնչող ռազմատենչ հայտարարությունները բարդացնում են Ղարաբաղի շուրջ բանակցային գործընթացում վստահության մթնոլորտի ստեղծումը և բանակցությունների առաջընթացը, ասել է ՀՀ արտգործանախարար Էդվարդ Նալբանդյանը՝ ԵԱՀԿ Մինսկի խմբի համանախագահներ Բեռնար Ֆասիեի (Ֆրանսիա), Մեթյու Բրայզայի (ԱՄՆ), Յուրի Մերզլյակովի (Ռուսաստան) և ԵԱՀԿ գործող նախագահի անձնական ներկայացուցիչ Անջեյ Կասպրշիկի հետ հանդիպման ընթացքում։

Ինչպես շաբաթ օրը «Նովոստի-Արմենիա» գործակալությանը տեղեկացրեցին ՀՀ ԱԳՆ մամուլի և տեղեկատվության վարչությունից, նախօրեին Երևանում տեղի ունեցած հանդիպման ժամանակ Նալբանդյանը նաև ներկայացրել է Հայաստանի մոտեցումները՝ Մադրիդում 2007թ. նոյեմբերին ԵԱՀԿ Մինսկի խմբի համանախագահների ներկայացրած առաջարկությունների վերաբերյալ։

Համանախագահները Նալբանդյանին տեղեկացրել են Բաքվում Ադրբեջանի նախագահի և արտգործնախարարի հետ հանդիպումների արդյունքների մասին` նշելով ղարաբաղյան հիմնախնդրի բացառապես խաղաղ ճանապարհով լուծման անհրաժեշտությունը: 

Համանախագահները նաև վստահեցրել են, որ շարունակելու են ջանքերը կողմերի դիրքորոշումները մոտեցնելու ուղղությամբ` մադրիդյան առաջարկությունների հիման վրա:

Բաքվից Երևան ժամանած Մինսկի խմբի համանախագահները հունիսի 27-ին Ադրբեջանի նախագահ Իլհամ Ալիևի և արտգործնախարար Էլմար Մամեդյարովի հետ հանդիպումը դրական են գնահատել։